Чурапчы улууһун култуура салалтатын уонна култуура эйгэлээхтэрин ааттарыттан, улууспут бары олохтоохторун

Чурапчы улууһун култуура салалтатын уонна култуура эйгэлээхтэрин ааттарыттан, улууспут бары олохтоохторун
Олоҥхо күнүнэн эҕэрдэлиибит!
Yгүс үйэлэр усталарыгар өбүгэлэрбит айан хаалларбыт сүдү айымньыларыгар саха норуотун өлбөт-сүппэт муудараһа иҥэн сылдьар. Оол саҕаттан Олоҥхо биһиги норуоппут өркөн өйүн, иллээх-эйэлээх олоххо тардыһыытын, кыайыыга-хотууга, кэрэҕэ-сырдыкка дьулуурун туоһулуур. Бу үйэлээх баайбыт ханнык баҕарар уустук кэми туоруурга, тылбытын, төрүт үгэспитин чөл хаалларарга тирэх буолар.
Олоҥхо күнүн көрсө, Саха Өрөспүүбүлүкэтин Ил Дархана Айсен Сергеевич Николаев олоҥхону толорооччуларга, оһуохай тылын этээччилэргэ, тимир уустарыгар, норуот маастардарыгар анал истипиэндьийэтин туттарар.
Чурапчы улууһуттан быйылгы сыл стипендиаттарынан олоҥхону толорооччуларга Сусанна Васильевна Лазарева, уустарга Попов Василий Степанович стипендиат үрдүк аатын ыллылар. Маны тэҥэ оҕолорго олоҥхону толорооччуларга анал бириэмийэни Сайаан Максимов тутта.
Тоҕустуура томтордоох Чурапчыбыт туонакатыгар, саха норуотун уус-уран айымньытыгар интэриэс уонна болҕомто күнтэн күн улаатан иhэрин. Улуу олоҥхоһуппут И.Г. Тимофеев-Теплоухов “Куруубай хааннаах Кулун Куллустуур” олоҥхо дьүһүйүү быһыытынан туруоруллуута сыанаҕа сүрэхтэниитэ элбэҕи этэр. Улууспутугар күн бүгүн Николай Тарасов, Николай Григорьев, Анатолий Христофоров, Сусанна Лазарева, Николай Дьячковскай, курдук улахан олоҥхону толорооччулардаах буоламмыт, аныгы балысханнык сайдар кэммитигэр Олоҥхо бэйэтин уhулуччу суолталаах күүһүн, дириҥ ис хоhоонун, төрөөбүт дойдуга бэриниилээх буолар сыhыаны, төрүт үгэспитин, кырачааннарга төрөөбүт тыл сүөгэйин сүмэтин олоҥхо нөҥүө иҥэринэллэригэр тирэх буолаллар. Төрүттэрбит кэс тылларын энчирэппэккэ, төрүт культурабытын харыстыырга, байытыыга, ыччакка чөл тиэрдиигэ дьулуhуоҕуҥ. Төрөөбүт дойдубут чэчирии сайдарын туhугар кыhаллыаҕыҥ диэн баҕа санаабытын тиэрдэбит.