Чурапчытааҕы Оҕо-ыччат спордун оскуолата тэриллибитэ 25 сыла

Чурапчытааҕы Оҕо-ыччат спордун оскуолата тэриллибитэ 25 сыла

1999 сыллаахха Чурапчы улууһун баһылыга Алексей Алексеевич Шадрин көҕүлээһининэн, атырдьах ыйын 30 күнүгэр 405 нүөмэрдээх дьаһалынан улуус үөрэҕин салалтатын иһинэн эбии үөрэхтээһин Оҕо-ыччат спортивнай оскуолатын аһар туһунан уураах тахсыбыта. Бастакы кэмҥэ оскуола Афанасий Кирикович Софронов аатынан мас саалаҕа олохтоммута.

Чурапчы орто оскуолата ДЮСШ үлэлииригэр сүрүн тирэх буолбута. Остуол тенниһэ, мас тардыһыыта, волейбол дьарыктара саҕаламмыттара. Мугудайга буулдьанан ытыы уонна байыаннай многоборье, Кытаанахха хайыһар, Одьулууҥҥа мас тардыһыыта, Хайахсыкка остуол тенниһэ, Дириҥҥэ волейбол секциялара үлэлээн барбыттара.

2003-2004 үөрэх сылын саҕаланыытыгар оскуола «2000 үтүө дьыала» бырагырааманан тутуллубут саҥа спортивнай комплекс дьиэтигэр көспүтэ. 2016 сыллаахха Александр Иванович Федотов аатынан саҥа спорт уораҕайа улуус баһылыгын уурааҕынан оскуолаҕа бэриллэн – эдэр спортсменнарга, тренердэргэ өссө күүскэ дьарыктаналларыгар, үлэлииллэригэр төһүү күүһүнэн буолбута.

Үбүлүөйү көрсө, соторутааҕыта Чурапчы улууһун бүтүн Саха өрөспүүбүлүкэтигэр ааттаппыт чулуу спортсмеммыт, ССРС көҥүл тустууга оҕолорго маҥнайгы чөмпүйүөнэ Вячеслав Павлович Карпов аата оскуолаҕа иҥэриллибитэ.

Үөрүүлээх дьаһалга улуус баһылыга Степан Саргыдаев, улуус дьокутааттарын Сэбиэтин бэрэссэдээтэлэ Яков Оконешников, Саха Өрөспүүбүлүкэтин Олимпийскай эрэллэри бэлэмниир киин дириэктэрин солбуйааччыта Александр Андреев, Вячеслав Павлович Карпов төрөппүт уола Павел Карпов, Таатта улууһун дэлэгээссийэтэ, нэһилиэктэр баһылыктара, тэрилтэ салайааччылара, үөрэх салалтата, о.д.а. кэлэн эҕэрдэлээтилэр, наҕараадалары, бэлэхтэрин туттардылар.

“Спорт – биһиэхэ, чурапчыларга, ураты миэстэни ылар. Ону толорор сыалтан биһиги улууспутугар үөрэх салалтатын иһинэн 1999 сыллаахха Оҕо-ыччат спордун оскуолата тэриллэн, маассабай спорт көрүҥнэрин сайыннаран, үгүс оҕону эрчийэн, дьарыктаан, үүнэн-сайдан кэллэ. 25 сыл иһигэр биһиги оскуолабыт улуус 12 нэһилиэгин хабан, 17 спорт араас көрүҥнэригэр дьарыктаан кэллэ.

Биһиги киэн туттабыт үөрэнээччилэрбитинэн. Кинилэр ситиһиилэрэ атын оҕолорго холобур буолаллар. Чурапчы тоҕус томторо – чулуулар үөскээбит сирдэрэ буоларын, чаҕылхай кыайыыларынан, удьуордаах, утумнаах үлэнэн бигэргэтэн, 25 сыл иһигэр Чурапчы улууһун Оҕо-ыччат спортивнай оскуолата буулдьанан ытыы, бокса, хотугу многоборье, остуол тенниһэ, мас тардыһыыта, атах оонньуута, хайыһар, ох саанан ытыы спорт көрүҥнэригэр 9 — Россия спордун маастарын, 14 – Россия спордун маастарыгар кандидаттарын, 17 — Саха өрөспүүбүлүкэтин спордун маастарын, 11 — Саха өрөспүүбүлүкэтин спордун маастарыгар кандидаттарын иитэн таһаарда.

Оскуолабыт ситиһиилээх спортсменнары эрэ буолбакка, физкультура уонна спорт эйгэтигэр үлэлиир улууска, республикаҕа биллэр педагог-настаабынньыктары үүннэрэн-сайыннаран таһаарда. Ол курдук, үгүс уопуттаах, киэҥ билиилээх, талааннаах тренердэр — Семен Прокопьевич Макаров, Светлана Николаевна Башарина, Геннадий Изотович Кривошапкин, Иван Степанович Захаров, Николай Федорович Смирников, Григорий Михайлович Кривошапкин, Николай Капитонович Сивцев, Егор Савельевич Капитонов, Альберт Федорович Иванов.

Бу 25 сыл устата Виктор Семенович Дьяконов, Семен Семенович Морфунов, Дьулустан Васильевич Егоров, Яков Павлович Оконешников таһаарыылаахтык, Чурапчы улууһугар оҕо спорда сайдарын туһугар кыахтарын, сыраларын ууран туран дириэктэрдэринэн үлэлээбиттэрэ.

Билигин даҕаны биһиги үлэбитигэр күүс – көмө, сүбэһит буолаллар. Түгэнинэн туһанан кэлэктиибим уонна тус бэйэм ааппыттан махталбын тиэрдэбин”,- диэн дириэктэр Александр Неустроев кэпсиир.

Елена Макаринская

https://санаолох.рф/churapchytaa5y-o5o-ychchat-spordu..