Чурапчы улууһун киэҥник ааттаппыт Дьүөгэ иистэнэр сыах аһыллыбыта 20 сыла үөрүүлээх быһыыга-майгыга бэлиэтэннэ.

Чурапчы улууһун киэҥник ааттаппыт «Дьүөгэ» иистэнэр сыах аһыллыбыта 20 сыла үөрүүлээх быһыыга-майгыга бэлиэтэннэ.

2004 сыллаахха аһыллыбыт 4 киһилээх сыах билигин туспа дьиэлээх-уоттаах, талааннаах маастардардаах, элбэх сакаастааччылаах, дьон кутун туппут үлэлэрдээх. Сыах 20 сыл устата элбэх киһини үлэнэн хааччыйан, иискэ уһуйан, үөрэтэн, чурапчыларга эрэ буолбакка, атын улуус дьонугар тупсаҕай таҥаһы-сабы хаачыстыбалаахтык тигэн кэллэ. Араас таһымнаах республикатааҕы, россиятааҕы, аан дойдутааҕы күрэхтэргэ кыайыылааҕынан ааттанан, бириистээх миэстэлэргэ тиксэн, Чурапчы уран тарбахтаах маастардарын, саха таҥаһын киэҥник ааттаттылар.

«Дьүөгэ» төрүттээччитэ СӨ норуотун маастара, СӨ өҥөнү оҥоруу эйгэтин үтүөлээх үлэһитэ, Игидэй нэһилиэгин Бочуоттаах олохтооҕо Татьяна Николаевна Карсанаева улуус дьахталларын Сүбэтин састаабыгар таһаарыылаахтык үлэлээбитэ, күн бүгүнүгэр диэри общественнай хамсааһыннар көхтөөх кыттааччыта.

Бүгүн “Айылгы” норуот айымньытын дьиэтигэр кинилэр тикпит маанылаах саха таҥастара, ситиһиилэрэ, бэлиэ сылга ананан тахсыбыт кинигэлэрэ бар дьон көрүүтүгэр таҕыста. Иистэнньэҥнэри бииргэ алтыһан ааспыт дьоно-сэргэтэ, атын улуустартан кэлбит ыҥырыылаах ыалдьыттар эҕэрдэлээтилэр.

«Дьүөгэ» сыах бэҕэһээ саха халадаайын тигиитигэр күрэх тэрийдэ. 8 кыттааччыттан бастыҥ түмүгү көрдөрөн, Алаҕар нэһилиэгиттэн Мария Мохначевская кыайыылааҕынан ааттанан, бүгүн иис сыаҕа туруорбут 20 тыһыынча солк. суумалаах бирииһи тутта.

«Дьүөгэлэри» 20 сылларынан эҕэрдэлээн, улууска урбаан уонна өҥөнү оҥоруу сайдыытыгар кылааттарын иһин махтанан туран наҕараадалары туттардыбыт.

Эһиги илиигит сылааһын, иэйиигит итиитин иҥэрэн тикпит таҥастаргыт норуоппут култууратын уратытын, төрүт үгэстэрин үйэтитиигэ бастыҥ кылаат буолаллар. Өссө да элбэх киһи махталын ылан, айымньылаахтык, ситиһиилээхтик үлэлии-хамсыы туруҥ!