Арассыыйаҕа Дьиэ кэргэн, өрөспүүбүлүкэҕэ Оҕо саас, улууска Ыал Саргыта сылынан уонна ааспыт Ийэ.

Арассыыйаҕа Дьиэ кэргэн, өрөспүүбүлүкэҕэ Оҕо саас, улууска Ыал Саргыта сылынан уонна ааспыт Ийэ, Аҕа күннэринэн бүгүн Чурапчытааҕы төрүүр дьиэттэн икки кырачаан киһини үөрүүлээх быһыыга-майгыга дьиэлэригэр атаардылар.

Лилия уонна Алексей Лыткиннар үһүс уол оҕону, Мария уонна Николай Новгородовтар иккис кыыс оҕону күн сиригэр көрдөрдүлэр. Үөрүүлээх чааска улуус дьаһалтатыттан Алена Пермякова уонна Татьяна Бушкова, киин балыыһа кылаабынай бырааһа Николай Сивцев, төрүүр дьиэ быраастара, сиэстэрэлэрэ эҕэрдэ тылларын, баҕа санааларын эттилэр, бэлэхтэрин туттардылар.

“Былырыын 217 ийэ төрөөбүт буоллаҕына, бүгүҥҥү күҥҥэ 163 ийэ оҕолонно. Урукку сылларга 300-400 дьахтар төрүүр эбит буоллаҕына, билигин аччаата. Бэйэбит испитигэр 13 кырачаан киһи күн сирин көрдө. Ол эбэтэр биһиги доруобуйатын туругунан олох үчүгэй уонна ыксаллаах быһыыга эрэ төрөтөр бырааптаахпыт. Онтон атыттар бары Дьокуускайга баран, перинатальнай кииҥҥэ төрүүллэр”, - диэн акушер-гинеколог быраас Анастасия Пономарева кэпсиир.