В.С. Соловьев-Болот Боотур аатынан Хатылы оскуолатыгар Цифровой эйгэ бырайыак аана тэлэлиннэ.

В.С. Соловьев-Болот Боотур аатынан Хатылы оскуолатыгар «Цифровой эйгэ» бырайыак аана тэлэлиннэ.

Балаҕан ыйын 6 күнүгэр Хатылы орто оскуолатыгар “Үөрэхтээһин” национальнай бырайыак чэрчитинэн үлэлиир “Цифровая образовательная среда” бырайыагынан саҥа кылаас арылынна. Кабинет Федеральнай ирдэбилинэн оҥоһуллан, киэркэйэн, оҕолору цифровой хайысха сатабылларыгар үөрэтэргэ, уһуйарга бары өттүнэн бэлэм буолла. Салайааччынан информатика учуутала Макарова М.И. ананан, информатика уруоктарын, үөрэх кэннэ эбии дьарыктары саҥа кэлбит цифровой техникэлэри туһанан ыытан саҕалаата. Бырайыагынан кэлбит цифровой техникэ информатика уруоругар эрэ буолабакка, хас биирдии уруокка, учууталлларга, оҕолорго көмө буолуоҕа.

Тэрээһиҥҥэ оскуола дириэктэрэ Егорова Е.И. оҕолорго туһаайан үөрэхтээһин саҥа ирдэбиллэригэр олоҕуран, саҥаны саҕалаан, боруобалаан, үөрэтэн-чинчийэн үүнэн-сайдан иһэллэригэр баҕарда. Чурапчы улууһун үөрэҕин салататын салайааччытын солбуйааччытын эбээһинэһин толорооччу Винокурова И.Г., улуус үөрэҕин тэрилтэлэригэр цифровой хайысха балысханнык сайдан иһэрин, оҕолорбут ситиһиилэрин ыыра кэҥээн иһэрин киэн тутта эттэ, онуоха улууспут тустаах үлэни табыгастаахтык ыытарын бэлиэтээтэ. “Хатылы нэһилиэгэ” МТ исписсэлииһэ Козлова О.В. эҕэрдэ сурук туттарда, оҕо-ыччат сайдарын туһугар ыытыллар үлэ-хаманс иһин махтал тылларын анаата. Салгыы, куйаар ситимин нөҥүө ХИФУ инфоратика уо математика институтун дириэктэрэ Пинигина Нь.Р. холбонон эҕэрдэтин тиэртэ.

Оскуола үөрэнээччилэрэ Чичигинаров Витя, Винокурова Амелия, Дьячковская Ева, Петрова Карина, Криврошапкин Жора, Баишев Павел кэлбит ыалдьыттарга искусственнай интеллект, 3 д моделирование өттүнэн сатабылларын көрдөрдүлэр, Кузьмин Дима хамаандатын кытта бэйэлэрэ оҥорон таһаарбыт “УТСУ” оонньууларын кэпсээтилэр. Хас оскуола аайы цифровой хайысха киирэн, үлэ-хамнас саҥалыы салаллан оҕолор-ыччаттар киэҥ ыырдаах, сайдыылаах дьон буола улаатан дойдуларын ааттатар дьон буоллуннар.