Чурапчы улууһун нэһилиэктэрин икки ардыларынааҕы Сайыҥҥы сүүмэрдиир спартакиада САССР төрүттэммитэ 100...

сылыгар уонна улууска Ийэ сылыгар ананна. Тэрээһиҥҥэ улуус салалтата, олохтоохтор, Чурапчы, Хадаар, Хатылы, Кытаанах, Сылаҥ, Одьулуун, Дириҥ, Арыылаах, Чакыр нэһилиэктэриттэн сүүмэрдэммит хамаандалар, судьуйалар уо.д.а. кытыннылар.

Спартакиада аһыллыыта хамаандалар парадтарыттан саҕаланна. Улуус баһылыга Степан Саргыдаев нэһилиэк, улуус чиэһин көмүскүү сылдьар бары кыттааччылары Сайыҥҥы спартакиада үөрүүлээх арыллыытынан эҕэрдэлээн туран, кинилэргэ сүүмэрдээһини чиэстээхтик туоруулларыгар итиэннэ Уус Алдаҥҥа ыытыллаары турар улахан күрэхтэһиилэргэ кыайыыны-хотууну баҕарда. "Ким бэлэмнээх - кыайдын, ким күүстээх - хоттун!", - диэн улуус спортка салаатын салайааччыта Иван Оконешников уонна спартакиада сүрүн судьуйата Владислав Кривошапкин бэйэлэрин эҕэрдэлэрин тиэртилэр.
Бу күн Чурапчы улууһугар маассабай спорт сайдыытыгар сүдү кылаатын киллэрбит А.К.Софронов аатын сүгэр "Боотур Уус" стадиоҥҥа улуустааҕы Сайыҥҥы спартакиадаҕа улуус бастыҥ быһый сүүрүктэрэ, тааһы көтөҕөр күүстээхтэрэ, мадьынылар, хапсаҕайдьыттар кытталлар.
"Бүгүҥҥү спорт түһүлгэтигэр саҥа ааттар ааттанныннар, саҥа рекордар олохтоннуннар! Кытаатыҥ: иннибитигэр Бороҕоҥҥо өссө улахан күүстээх киирсиилэр күүтэллэр!", - диэтэ улуус баһылыга Степан Саргыдаев.