Дьоруойдарбыт сырдык ааттарын үйэтитиигэ: сахалыы ыстаныыларга аһаҕас турнир
09:57 07.04.2026 16+
Дьоруойдарбыт сырдык ааттарын үйэтитиигэ: сахалыы ыстаныыларга аһаҕас турнир
Муус устар 3 күнүгэр Чурапчы улууһугар ураты суолталаах түгэн буолан ааста. Петр Митрофанович Васильев аатынан Соловьев орто оскуолата төрүттэммитэ 100 сылын көрсө, анал байыаннай дьайыыга олохторун толук уурбут, дойдубут хорсун уолаттарын, бастыҥ спортсменнарбытын кэриэстээн, Өрөспүүбүлүкэтээҕи сахалыы ыстаныыларга аһаҕас турнир тэрилиннэ.
Бу күрэхтэһии — кинилэр сырдык мөссүөннэрин үйэтитиигэ, кинилэр ааттарын көлүөнэттэн көлүөнэҕэ тиэрдиигэ ананар. Турнирга аналларын суолун сулус оҥостубут дьоруойдарбыт:
Станислав Захарович Федоров— сахалыы ыстаныыларга Россия спордун маастара;
Виктор Викторович Илларионов — көҥүл тустууга Россия спордун маастара;
Витaлий Витальевич Захаров — «Азия оҕолоро» норуоттар икки ардыларынааҕы оонньуулар чэпчэки атлетикаҕа призера;
Дмитрий Илларионович Попов — сахалыы ыстаныыларга республика чемпиона, призера.
Кинилэр олохторо, хорсун быһыылара — биһиги бүгүҥҥү күүспүт уонна киэн туттуубут.
Кылыыһыттарбыт күүстээх киирсэр куоталаһыыларыгар эдэр эрчимнээх спортсменнар Дмитрий Петрович Коркин аатынан Чурапчытааҕы олимпийскай эрэллэри бэлэмниир өрөспүүбүлүкэтээҕи интернат-оскуолаттан, Семен Андреевич Новгородов аатынан Чурапчытааҕы орто оскуолатыттан, Мугудай, Хадаар, Болугур нэһилиэктэриттэн, Таатта, Үөһээ Дьааҥы уонна Өлүөхүмэ улууһуттан кэлэн кыттыыны ылан, бэйэлэрин дьоҕурдарын көрдөрдүлэр.
Тэрээһин сүргэни көтөҕөр таһымҥа ааһарыгар сүрүн спонсордар, дьоруойдарбыт чугас дьонноро, доҕотторо улахан өйөбүл буоллулар. Станислав Федоров аҕата Захар Иванович уонна уола Вячеслав, аймахтара, Мырылаҕа бииргэ үөрэммит оҕолоро, Чурапчытааҕы педагогическай училище ону тэҥэ Чурапчытааҕы физкультура уонна спорт институтутун бииргэ үөрэммит доҕотторо. Дмитрий Попов кэргэнэ Саргылаана, ииппит ийэтэ Айталина Ивановна, тэҥҥэ улааппыт убайдыы бырааттара, чугус аймахтара, бииргэ үөрэммит оҕолоро, доҕотторо, Дьокуускай куорат иккис нүөмэрдээх оскуолатын дириэктэрэ Владимиров В.М. Виктор Илларионов кэргэнэ Евдокия Петровна, интернат оскуолаҕа бииргэ үөрэммит оҕолоро, Мырылаҕа бииргэ улааппыт доҕотторо. Виталий Захаров төрөппүттэрэ Елена Васильевна, Виталий Николаевич, чугас аймахтара, бииргэ үөрэммит доҕотторо, учууталлара — бары биир санаанан түмсэн, кинилэр ааттарын кэриэстээтилэр.
Ону таһынан, анал бэлэхтэри туруордулар: Петр Митрофанович Васильев аатынан Соловьев орто оскуолата, Соловьев нэһилиэгин сахалыы ыстаныыларга спорт маастардара, оскуола мецената Сергей Леонидович Тихонов, «Патриот» Саха сирин ыччатын киинэ, Чурапчы улууһун спордун салалтата, Чурапчы улууһун үөрэҕин салалтата, Баһылай Манчаары аатынан өрөспүүбүлүкэтээҕи төрүт көрүҥнэри сайыннарар «Модун» спортивнай киин, Чурапчы улууһун сахалыы ыстаныыларга федерация салайааччыта Владимир Дмитриевич Сивцев, Семен Андреевич Новгородов аатынан Чурапчы орто оскуолатын физкультураҕа учуутала Владислав Николаевич Кривошапкин уонна Соловьев орто оскуолатын «Боотур Кыһата» интернат үлэһиттэрэ.
Тэрээһин арыллыытыгар, Виталий Захаров төрөппүттэрэ Елена Васильевна, Виталий Николаевич уонна бииргэ төрөөбүттэрэ эдэр спортсменнар өссө да үүнэ-сайда туралларыгар баҕа санааларын тиэрдэн, Иван Иванович Чиркоевка 100 тыһыынча солкуобайга дьарыктанар тэрил ыларыгар сертификат туттардылар. Бу күн турнир үрдүк таһымын, кыайыылаахтарга дьоһун наҕараадалары хааччыйар сыалтан, күрэхтэһии уопсай бириис пуондата 400 000 солкуобайга тиийэн, дьоҥҥо-сэргэҕэ үтүө холобур буолла.
Дьоруойдарбыт ааттара — үйэлээх, кинилэр сырдык мөссүөннэригэр сүгүрүйэбит!
Бары кыайыылаахтары эҕэрдэлиибит! Инникигитигэр өссө үрдүк чыпчааллары, чэгиэн туругу баҕарабыт! Кылыы, ыстаҥа уонна куобах күрэхтэрин түмүгүн сайтка көрүн https://clck.ru/33rVny
Иһитиннэриини сырдатта Илана Никитина.
