Буойун учуутал, үйэтитээччи И.М.Павлов ааҕыылара
16:22 18.02.2026 16+
Буойун учуутал, үйэтитээччи И.М.Павлов ааҕыылара
Аҕа дойду Улуу сэриитин ветерана, Саха АССР үтүөлээх учуутала, Саха Республикатын П. А. Ойуунускай аатынан государственнай бириэмийэ лауреата, Чурапчы оройуонун, Болугур уонна Чурапчы нэһилиэктэрин бочуоттаах олохтооҕо, буойун, учуутал, чинчийээччи Иван Михайлович Павлов 105 сааһын көрсө, кини аатын сүгэр Чурапчы орто оскуолатыгар IX төгүлүн өрөспүбүлүкэтээҕи научнай-практическай кэмпириэнсийэ үрдүк таһымҥа ыытылынна. Сахабыт сирин араас муннуктарыттан: Уус Алдан, Чурапчы, Амма, Нам, Мэҥэ Хаҥалас, Хаҥалас, Сунтаар, Өлүөхүмэ, Үөһээ Бүлүү, Кэбээйи, Муома, Эдьигээн, Ньурба, Алдан, Таатта, Горнай улуустарыттан уонна Дьокуускай куораттан 61 оскуола оҕото, 25 учуутал кэлэн дакылааттарынан уонна бырайыактарынан кытыннылар.
Бу күн оскуола оҕолоро “И.М.Павлов монографическай түмэлин” туһунан уонна “19-c поисковай биригээдэ” үлэтин туһунан ыалдьыттарга уонна кэмпириэнсийэ кыттыылаахтарыгар кэпсээтилэр. Аҕа дойду Улуу сэриитин сылларын уонна сураҕа суох сүппүт саллааттар тустарынан үйэтитээччи Иван Михайлович Павлов кинигэлэрин быыстапката турда.
Кэмпириэнсийэ үөрүүлээх аһыллыытыгар: “Чурапчы оройуона” муниципальнай тэриллии баһылыгын социальнай боппуруостарга солбуйааччы М.Ф.Кронникова, Чурапчы нэһилиэгин быһылыгын социальнай боппуруостарга солбуйааччы В.В.Макарова, улуус дьокутааттарын сэбиэтин бэрэссэдээтэлэ Я.П.Оконешников, Чурапчы улууһун үөрэҕин салалтатын начальнига Ю.П.Посельскай, С.Н.Донской- II аатынан Үөрэҕи сайыннарар уонна идэ таһымын үрдэтэр институт история уонна обществознание кафедратын сэбиэдиссэйэ Г.Г.Решетников эҕэрдэ тылларын эттилэр.
Кэмпириэнсийэ үлэтэ 5 хайысханан барда
· Бастакы уонна иккис хайысха «Иван Михайлович Павлов олоҕо, үлэтэ. Саха буойуннарын ааттарын үйэтитии»;
· Үһүс хайысха "Мин төрөөбүт дойдум, кыраайы үөрэтии";
· Төрдүс хайысха «Мин патриоппун» (оҕо хамсааһынынын, байыаннай-патриотическай кулууп иитиллээччилэрин бырайыактара);
· Бэһис хайысха «Оҕону иитиигэ гражданскай үөрэхтээһин уонна быраап»(учууталларга);
Хайысхаларынан кылаан кыайыылаахтар уонна дипломаннар быһаарылыннылар. Сиһилии Үөрэх салалтатын сайтыгар аах https://clck.ru/3RstDd
