Тохсунньу 3 күнүгэр С
17:38 03.02.2026 16+
Тохсунньу 3 күнүгэр С.К. Макаров аатынан Чурапчы гимназиятыгар "Үөрэххэ ситимнээх буолуу: үөрэх процеһын тохтоло суох буолуутун уонна хаачыстыбатын хааччыйыы" диэн Чурапчы улууһун үөрэх үлэһиттэрин олунньутааҕы сүбэ мунньаҕын чэрчитинэн бастыҥ учууталлар аһаҕас уруоктары ыыттылар.
С.К. Макаров аатынан Чурапчы гимназиятыттан:
Сергей Сергеевич Абрамов, «Куттал суох буолуутун уонна Ийэ дойду көмүскэлин төрдө» предмет учуутала, «Маҥнайгы көмөнү оҥоруу» диэн тиэмэҕэ уруок ыытта. Евдокия Афанасьевна Пермякова, физика учуутала, “Механические колебания” тиэмэҕэ уруогун көрдөрдө. Прокопий Прокопьевич Захаров, информатикаҕа – «Системы счислений» тиэмэҕэ, Любовь Михайловна Дьячковская математикаҕа – «Сумма углов треугольника», Кыдаана Михайловна Екечьямова математикаҕа – «Дроби вокруг нас» уроктары биэрдилэр. Евгений Вячеславович Прокопьев, С.А. Новгородов аатынан Чурапчы орто оскуолатын информатика учуутала – «Переводы из различных систем счислений» тиэмэҕэ урок ыытта. Николай Николаевич Романов, Павел Дмитриевич Собакин, Василий Васильевич Степанов, Саргылана Давыдовна Полятинская, Чурапчы улууһун физкультура уонна «Куттал суох буолуутун уонна Ийэ дойду көмүскэлин төрдө» предмет учууталлара «Современные образовательные технологии на уроках физкультуры» диэн маастар-кылаас оҥордулар.
Уруоктарга Чурапчы улууһун учууталлара сырыттылар. Хас биирдии уруок үрдүк таһымнаахтык ыытылынна.
Алтынбек Камчыбекович Омуров, Одьулуун орто оскуолатын физкультура учуутала:
– Сергей Сергеевич Абрамов уонна физкультура учууталларын уруоктарыгар сырыттым. Олус сэҥээрдим. Саҥа учууталлаан эрэр буоламмын билии бөҕө ыллым. Физкультура уруогар олимпиада сорудахтарын туһунан биллим. Уустук баҕайы эбит. Оҕолору утумнаахтык дьарыктаан олимпиадаҕа кытыннараллар эбит. Кэрэхсэбиллээх аһаҕас уруоктар иһин кэллиэгэлэрбэр махтанабын. Чуолаан саҥа үлэһиттэргэ үчүгэй баҕайы тэрээһин буолла.
Лия Александровна Решетникова, С.А. Новгородов аатынан Чурапчы орто оскуолатын математика учуутала:
– Оҕолор үчүгэйдик үлэлээтилэр. Сорудаҕы барытын толорон истилэр. Өйдөөбөтөхтөрүн ыйыталаһан, барытын толордулар. Уруок сыалын-соругун ситистилэр. Математика учуутала буоламмын суоттуулларын көрдүм. Аһаҕас уруоктарга сылдьар үчүгэй, киһи элбэх саҥаны билэр. Билэргин даҕаны атын өттүттэн, саҥалыы көрөҕүн. Онон туһата элбэх.
Марфа Андреевна Макарова, Г.П. Башарин аатынан Сылаҥ орто оскуолатын информатика учуутала:
– “Системы счислений” диэн тиэмэҕэ олус интэриэһинэй уруоктар буоллулар. Оҕолор сэҥээрэн үөрэннилэр. Бэйэм сөбүлээн ыытар тиэмэм буолан, уруоктары сэргии көрдүм. Кэллиэгэлэрбит уруоктарыгар сылдьан, саҥа идеялар үөскээтилэр. Маннык тэрээһиннэр өссө буолалларыгар баҕарабын. С.Г. Макарова “Тумус кыһа” медиа-киин салайааччыта, С.К. Макаров аатынан Чурапчы гимназията
