Улуус баһылыгын харыйатыгар бастыҥнар түмүстүлэр.
13:21 19.01.2026 16+
Улуус баһылыгын харыйатыгар бастыҥнар түмүстүлэр.
Бүгүн, үтүө үгэс буолбут улуус баһылыгын оҕолорго Харыйата ыытылынна. Үөрүүлээх тэрээһиҥҥэ улууспут оскуолаларыттан 2025 сыл устата туйгуннук үөрэммит, араас таһымнаах кэмпириэнсийэлэргэ,олимпиадаларга, спортивнай күрэхтэргэ бастаабыт, култуурунай бэстибээллэргэ, общественнай, волонтерскай үлэҕэ бэйэлэрин көрдөрбүт оҕолор түмүстүлэр. Тэрээһин чэрчитинэн оҕолорго араас маастар-кылаастар, түмэр оонньуулар тэриллэн ыытылыннылар. «Үөрүү» оҕо сайдар киинин оҕолоро, «Алиса в стране чудес» диэн бэртээхэй дьүһүйүүнү туруоран, көрөөччүлэри остуоруйа алыптаах эйгэтигэр киллэрэн, умнуллубат түгэннэри бэлэхтээтилэр.
Үөрүүлээх чааска улуус баһылыга Степан Саргыдаев мустубут оҕолору эҕэрдэлээтэ. 2025 сылга – Арассыыйаҕа Аҕа дойдуну көмүскээччи, СахаӨрөспүүбүлүкэтигэр - Дойдуну көмүскээччи, Чурапчы улууһугар -Үйэлээх килбиэн сыллара биллэриллэннэр элбэх үлэ ыытыллыбытын, үтүө түмүктэрдээх, кыайыы-хотуу үктэллээх, үүнүү-сайдыы аргыстаах сыл ааспытын бэлиэтээн эттэ. Степан Анатольевич, 2025 сылга уһулуччу ситиһиилээх Г.П. Башарин аатынан Сылан ортооскуолатын үөрэнээччитигэр Трофимова Вероникаҕа уонна И.М. Павлов аатынан Чурапчы орто осколатын үөрэнээччитигэр Макаров Эрсанна 10 тыс солкуобайдаах бириэмийэни уонна «Бастыҥтан бастыҥ” бэлиэни, «Бастыҥ үөрэнээччи», «Бастыҥ общественник», «Бастыҥ спортсмен» номинация кыайыылаахтарыгар бэлиэ суруктары туттарда.
Чурапчы улуһун үөрэҕин салалтатын салайааччыта Юрий Павлович Посельскай тэрээһин кыттыылаахтарыгар туһаайан: «Эһиги —улууспут чэчирии сайдар кэскилэ, сырдыкка дьулуурдаах, үтүөнү үксэтэр уонна туйгуну тутуһар дьоһун ыччаттарбыт буолаҕыт. Эһигинэн киэҥ туттабыт!» -диэн туран “Билинии” (Признание) анал аат бириэмийэни 9-ус кылааска сүрүн судаарыстыбаннай эксээмэннэрин үрдүк баалга суруйбут Г.П. Башарин аатынан Сылан орто оскуолатын үөрэнээччитигэрТрофимова Вероникаҕа уонна эбии үөрэхтээһиҥҥэ үрдүк көрдөрүүлэрин иһин «Сатабыл»(Творчество) анал аат бириэмийэтин «Үөрүү» оҕо дьоҕурун сайыннарар киин В.С.Яковлев-Далана атынан Кытаанах орто оскуолатын филиалын үөрэнээччитигэр Коркина Күннэйгэ туттарда.
“Бастыҥнар хамсааһыннара” Россиятааҕы оҕо түмсүүтүн уонна улуустааҕы “Чурапчы кэскилэ” түмсүүлэрин бэрэссэдэтэлэ, Н.Д. Субуруускай аатынан Болтоҥо орто оскуолатын туйгун үөрэнээччитэ Ариан Максимов оҕолор ааттарыттан улуус баһылыгар С.А. Саргыдаевка махтанна уонна Г. П. Башарин аатынан Сылан орто оскуолатын үөрэнээччилэрэ оҥорбут бэйэ бородууксуйатын бэлэх уунна.
Биир долгутуулаах
түгэнинэн оҕолору Чысхаан уонна Хаарчаана саргылаах Саҥа дьыл салаллан кэлбитинэн кэлэн эҕэрдэлээбиттэрэ буолла. Тэрээһин уоттаах-күөстээх дискотеканан түмүктэннэ.
