«Уолан оонньуулара» өбүгэ үгэстэрин билиһиннэриигэ туһуламмыт күрэх
12:56 28.02.2025 16+
«Уолан оонньуулара» өбүгэ үгэстэрин билиһиннэриигэ туһуламмыт күрэх.
Бу дьыл олунньу ый 27 күнүгэр, аатырбыт бөҕөс- олимпийскай чемпион Павел Пинигин төрөөбүт түөлбэтигэр, Хоптоҕо нэһилиэгэр, Дириҥнээҕи «Ыллык» уһуйаан бырайыагынан оскуолаҕа киириэн иннинээҕи саастаах уолаттарга улуустааҕы «Уолан оонньуулара» күрэх аан бастакытын Чурапчы улууһун үөрэҕин салалтатын өйөөһүнүнэн урдук таһымҥа ыытылынна.
Күрэх үөрүүлээх аһыллыытыгар Хоптоҕо нэһилиэгин Аҕа баһылыга А.Л.Бурцев, Чурапчы улууһун үөрэх управлениятын уопсай үөрэхтээһин сүрүн специалиһа М.П. Оконешникова, «Ыллык» уһуйаан сэбиэдиссэйэ Пестерева Е.В, Хоптоҕо нэһилиэгин Аҕа сүбэтин чилиэнэ Пестерев К.В эҕэрдэлээтилэр. Күрэхтэһии кылаабынай судьуйата, спорт комплекс салайааччыта И.С. Посельскай «Ким дьулуурдаах, тулуурдаах, толкуйдаах ол кыйдын!» - диэн оҕолорго ситиһиини баҕарда, эрэли үөскэттэ.
Ол курдук бэйэни билиһиннэрии түһүмэххэ уоланнар бэйэлэрэ хантан хааннаахтарын, кимтэн кииннээхтэрин аныгылыы видео- ролик нөҥүө билиһиннэрдилэр. Иккис түһүмэххэ туут хайыһарынан сүүрүү, үһүс түһүмэҕинэн уоланнар тииҥи ох саанан ытыыга күөн көрүстүлэр. Бииртэн биир бэргэн ытааччы, уолаттар бэлэмнээхтэрэ көстөр. Төрдүс түһүмэҕинэн тырыыҥка маһы бэлэмнээһин буолла. Уолаттар бу оонньуулар нөҥүө өбүгэ дьарыгын, үгэстэрин, дьарыктарын билсэллэр, эт – хаан өттүнэн сайдаллар. Уолан оонньууларын биир бэлиэ түһүмэҕинэн «Илимтэн балыгы араарыы» буолла. Олус сэргэх, тыҥааһыннаах киирсии буолла. Кыайыылаах түмүгэ төһө бириэмэнэн, 18 устуука (кэлбит курэх кыттааччы оҕо ахсаанынан) балыгы илимтэн арааран ылара буолла. Уол оҕо былыр былыргыттан булар талар, тарбаҕар дэгиттэр буолара. Бүтэһик быһаарыылаах түһүмэх «Тарбах тардыһыыта» диэн ураты дьаныардаах күрэх буолан биэрдэ. Күрэхтэһээччилэр икки ардыларыгар тыҥааһыннаах киирсии буолан дьон болҕомтотун тарта.
Алта түһүмэхтээх сыралаах сытыы киирсии кэнниттэн Муҥутуур кыайыылааҕынан 24 очколаах Дириҥнээҕи «Ыллык» уһуйаан иитиллээччитэ Долун Посельскай аттана. Хас түһүмэх аайа кыайыылаахтар мэтээлинэн, анал бирииһинэн наҕараадаланнылар.
Күрэх тэрийээччилэрин ааттарыттан күүс – көмө буолбут, спонсордаабыт Хоптоҕо нэһилиэгин администрациятыгар, бары тэрилтэлэригэр барҕа махталбытын тиэрдэбит.
